(ମମତା ସାମଲ ): ଲକଡାଉନ ଯୋଗୁଁ ମହାରାଷ୍ଟ୍ରରୁ ଛତିଶଗଡ଼କୁ ଫେରୁଥିବା ଶ୍ରମିକମାନେ ଟ୍ରେନ ଧକ୍କାର ଶିକାର ହୋଇଛନ୍ତି । ମହାରାଷ୍ଟ୍ରର ଔରଙ୍ଗାବାଦ ଜିଲ୍ଲାରେ ଆଜି ସକାଳ ସାଢ଼େ ୬ଟାରେ ଏହି ଅଭାବନୀୟ ଘଟଣା ଘଟିଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ମାଲଗାଡ଼ି ଧକ୍କାରେ ୧୪ ଜଣ ଶ୍ରମିକଙ୍କର ମୃତ୍ୟୁ ହୋଇଥିବା ବେଳେ ୫ ଜଣ ଗୁରୁତର ହୋଇଛନ୍ତି । ଗତ ମାର୍ଚ୍ଚ ୨୫ରୁ ଦେଶରେ ଲକଡାଉନ ଲାଗୁ ହୋଇଯିବା ପରେ ଛତିଶଗଡ଼ ରାଜ୍ୟର ଶ୍ରମିକମାନେ ମହାରାଷ୍ଟ୍ରରେ ଫସିଯାଇଥିଲେ । ଘରକୁ ଆସିବା ପାଇଁ କୌଣସି ପରିବହନ ବ୍ୟବସ୍ଥା ନଥିବାରୁ ବାଧ୍ୟ ହୋଇ ଚାଲି ଚାଲି ଆସୁଥିଲେ । ଔରଙ୍ଗାବାଦ-ନାନ୍ଦେଡ ରୁଟର କରମନ୍ଦ ଷ୍ଟେସନ ନିକଟରେ ଶ୍ରମିକମାନେ ରେଲଲାଇନ ଅତିକ୍ରମ କରୁଥିବା ବେଳେ ଦୁର୍ଘଟଣାର ଶିକାର ହୋଇଥିଲେ । ତେବେ ଆଜି ଭୋର ସକାଳୁ ଶ୍ରମିକମାନେ ଟ୍ରେନ ଲାଇନ ଅତିକ୍ରମ କରୁଥିବା ବେଳେ ସେହିସମୟରେ ଏକ ଖାଲି ଥିବା ମାଲଗାଡ଼ି ଟ୍ରେନ ସେମାନଙ୍କୁ ଧକ୍କା ଦେଇଥିଲା ।
ଦୁର୍ଘଟଣା ସଂପର୍କିତ ଖବର ହସ୍ତଗତ ହେବା ପରେ ଆରପିଏଫ ଏବଂ ସ୍ଥାନୀୟ ପୁଲିସ ଘଟଣାସ୍ଥଳକୁ ପହଞ୍ଚିଛନ୍ତି । ରିପୋର୍ଟ ଲେଖାଯିବା ବେଳକୁ ଉଦ୍ଧାର କାର୍ୟ୍ୟ ଜାରି ରହିଛି ।
