ଆଜିଠୁ ଖୋଲିଲା ଏମକେସିଜି ମେଡିକାଲ ଓପିଡି

(ରଜନୀକାନ୍ତ ପାତ୍ର/ହିଞ୍ଜିଳି): ଏକ ମାସରୁ ଅଧିକ ସମୟ ଧରି ବନ୍ଦ ରହିଥିବା ବ୍ରହ୍ମପୁର ଏମକେସିଜି ମେଡିକାଲର ଓପିଡି ଆଜି ସାଧାରଣଙ୍କ ପାଇଁ ଖୋଲିଛି । ଏଠାରେ ଲୋକଙ୍କ ଗହଳି ଏଡାଇବା ପାଇଁ ବ୍ୟାରିକେଡ ନିର୍ମାଣ କରାଯାଇଛି । ଓପିଡିରେ ସାମାଜିକ ଦୂରତା ରକ୍ଷା କରାଯିବା ସହ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି । ଜିଲ୍ଲାରେ କରୋନା ସଂକ୍ରମଣକୁ ଦୃଷ୍ଟିରେ ରଖି ଜୁଲାଇ ୮ ତାରିଖରୁ ଓପିଡିକୁ ବନ୍ଦ କରାଯାଇଥିଲା । ଚଳିତମାସ ୧୫ ତାରିଖରେ ଓପିଡି ଖୋଲିବ ବୋଲି କୁହାଯାଇଥିବା ବେଳେ ଗୋଟିଏ ଦିନ ପୂର୍ବରୁ ଏହାକୁ ଖୋଲାଯାଇଛି । ମେଡିକାଲର କିଛି ବିଭାଗକୁ ଅନ୍ୟତ୍ର ସ୍ଥାନାନ୍ତର ପରେ ଓପିଡି ଖୋଲିଛି । ଉଲ୍ଲେଖଯୋଗ୍ୟ, ଜିଲ୍ଲାକୁ ବହୁ ସଂଖ୍ୟକ ପ୍ରବାସୀ ଫେରିବା ପରେ ଏମକେସିଜି ମେଡିକାଲ ଓପିଡିରେ ରୋଗୀଙ୍କ ଗହଳି ଅଧିକ ମାତ୍ରାରେ ବଢି ଯାଇଥିଲା । ତେଣୁ କରୋନା ସଂକ୍ରମଣ ବୃଦ୍ଧି ପାଇବା ଆଶଙ୍କା କରି ଏହାକୁ ବନ୍ଦ କରିବାକୁ ନିଷ୍ପତ୍ତି ନିଆଯାଇଥିଲା । କିନ୍ତୁ ରୋଗୀ ସେବାକୁ ଦୃଷ୍ଟିରେ ରଖି ଆଜି ଓପିଡି ଖୋଲାଯାଇଛି।