କଦଳୀ ବୋଝେଇ ପିକଅପ ଭ୍ୟାନରୁ ଗଞ୍ଜେଇ ଜବତ

(ସୂର୍ଯ୍ୟକାନ୍ତ ବେହେରା/ମାଲକାନଗିରି): ମାଲକାନଗିରି ଜିଲ୍ଲା ଅଧିନସ୍ଥ କୁଡୁମୁଲୁଗୁମ୍ମା ଫାଣ୍ଡି ପାଖ ରାସ୍ତାରେ ଏକ ପିକ୍ଅପ୍ ଭ୍ୟାନରୁ ବିପୁଳ ପରିମାଣର ଗଞ୍ଜେଇ ଜବତ ହୋଇଛି । କୁଡୁମୁଲୁଗୁମ୍ମା ଫାଣ୍ଡି ରାସ୍ତାରେ ଏକ କଦଳୀ ବୋଝେଇ ପିକ୍ଅପ୍ ଭ୍ୟାନ ଯାଉଥିବା ବେଳେ ସନ୍ଦେହ ହେବାରୁ ଫାଣ୍ଡି ଅଧିକାରୀ ଗିରିଶ ଚନ୍ଦ୍ର ମହାରଣା, ଗୁମ୍ମା ଫାଣ୍ଡିର ଏକ ଟିମ୍ ସହ ଉକ୍ତ ପିକ୍ଅପ୍ ଭ୍ୟାନର ପିଛା କରିଥିଲେ । ନନ୍ଦିନୀଗୁଡା ନିକଟରେ ଗାଡିକୁ ଅଟକାଇ ଯାଞ୍ଚ କରିଥିଲେ । ଗାଡିର ଉପରଭାଗରେ କଦଳୀ କାନ୍ଧି ବୋଝେଇ ହୋଇଥିବା ବେଳେ ମଝିରେ ଗୁଡାଏ ପ୍ୟାକେଟ୍ ଗଞ୍ଜେଇ ଥିବା ଦେଖିବାକୁ ମିଳିଥିଲା । ପୋଲିସ ଗାଡିକୁ ଜବତ କରିବା ସହ ଡ୍ରାଇଭରକୁ ଅଟକ ରଖିଛି । ପାଖାପାଖି ୩ କ୍ୱିଣ୍ଟାଲରୁ ଅଧିକ ଗଞ୍ଜେଇ ଚିତ୍ରକୋଣ୍ଡା ଘାଟିରୁ ଉମରକୋଟ ଅଞ୍ଚଳକୁ ଚାଲାଣ ହେଉଥିବା ଜଣାପଡିଛି । ପ୍ରକାଶ ଥାଉକି, ତିନି ଦିନ ତଳେ ମାଥିଲି ଥାନା ଅନ୍ତର୍ଗତ ଚାଉଳ ମେନ୍ଦୀ ଗ୍ରାମ ନିକଟସ୍ଥ ଜଙ୍ଗଲରେ ପୋଲିସ ଓ ଗଞ୍ଜେଇ ମାଫିଆଙ୍କ ମଧ୍ୟରେ ଭୟାବହ ଲଢେଇ ହୋଇଥିଲା । ଏଥିରେ ବନବାସୀ ମହାରଣା ନାମକ ବାଲିମେଳା ଥାନାରେ କାର୍ୟ୍ୟରତ ଜଣେ ହୋମ୍ ଗାର୍ଡ ଶହିଦ ହୋଇଥିଲେ।