(ଭୁବନେଶ୍ୱର) : ଆସନ୍ତା ଡିସେମ୍ବର ୧୫ ତାରିଖରୁ ଅନିର୍ଦ୍ଦିଷ୍ଟ କାଳ ପାଇଁ କଲେଜରେ ପାଠପଢ଼ା ବନ୍ଦ କରିବ ୬୬୨ ବର୍ଗ କଲେଜ ସଂଘ। ଏଥିସହ ଲୋୟର ପିଏମଜିରେ ମହା ଆନ୍ଦୋଳନ କରିବ । ଏନେଇ ୬୬୨ ବର୍ଗ କଲେଜ ସଂଘର ସଭାପତି ସୂଚନା ଦେଇଛନ୍ତି।
ସୂଚନାନୁଯାୟୀ , ସଂଘର ଦାବିଗୁଡ଼ିକ ହେଲା ସମାନ ଗ୍ରେଡ ପେ ଆଧାରରେ ସମସ୍ତ ବର୍ଗଙ୍କୁ ସମାନ ଦରମା, ଏହି ବର୍ଗର କର୍ମଚାରୀଙ୍କୁ ପେନସନ ପରିସରଭୁକ୍ତ କରିବା, ୨୦୧୮ ଜି.ଓ. ଅନ୍ତର୍ଭୁକ୍ତ କର୍ମଚାରୀଙ୍କୁ ସପ୍ତମ ବେତନ ହାରରେ ଦରମା ପ୍ରଦାନ ଓ ବାଦ ପଡ଼ିଥିବା କର୍ମଚାରୀଙ୍କୁ ଅନୁଦାନ ପରିସରଭୁକ୍ତ କରିବା ଆଦି। ଗ୍ରାମାଞ୍ଚଳରେ ଶିକ୍ଷା ବ୍ୟବସ୍ଥାରେ ପ୍ରାୟ ୭୦ ଭାଗ ଦାୟିତ୍ଵ ଏ ବର୍ଗର କର୍ମଚାରୀମାନେ ବହନ କରୁଛନ୍ତି। ରାଜ୍ୟ ସରକାର ଉକ୍ତ ଦାବିଗୁଡ଼ିକୁ କର୍ଣ୍ଣାପତ କରୁନାହାନ୍ତି। ଅବସର ସମୟରେ କୌଣସି ଅବସରକାଳୀନ ସୁବିଧା ଓ ପେନସନ ମିଳୁନାହିଁ। ଫଳରେ ଡ଼ିସେମ୍ବର ୧୫ ତାରିଖରେ ସମସ୍ତ କଲେଜରେ ପାଠପଢ଼ା ବନ୍ଦ କରି ଆନ୍ଦୋଳନକୁ ଓହ୍ଲାଇବ କଲେଜ ସଂଘ।
