ବାଲ୍ୟବିବାହର ଅନ୍ତ ଘଟାଇବା, ବାଳିକାମାନଙ୍କ ଅଧିକାରର ସୁରକ୍ଷା ଏବଂ ସେମାନଙ୍କ ଶିକ୍ଷା, ସ୍ୱାସ୍ଥ୍ୟ ଓ ସୁରକ୍ଷିତ ଭବିଷ୍ୟତ ଗଠନ ଉଦ୍ଦେଶ୍ୟରେ ଭୁବନେଶ୍ୱର ୟୁପିଡି ପକ୍ଷରୁ ଜଟଣୀ ଥାନା ପରିସରରେ ‘JUVENTICA’ କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଚଳିତ କାର୍ଯ୍ୟକ୍ରମର ମୁଖ୍ୟ ବିଷୟବସ୍ତୁ “End Child Marriage and Invest in Girls’ Rights” (ବାଲ୍ୟବିବାହର ଅନ୍ତ ଘଟାନ୍ତୁ ଏବଂ ବାଳିକାଙ୍କ ଅଧିକାରରେ ନିବେଶ କରନ୍ତୁ) ରହିଥିଲା। ଏହି ଅବସରରେ ବିଦ୍ୟାଳୟ ଓ ମହାବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ବାଲ୍ୟବିବାହର କୁପରିଣାମ, ଶିଶୁ ଅଧିକାର, ନାରୀ-ପୁରୁଷ ସମାନତା ଏବଂ ବାଳିକାମାନଙ୍କ ସଶକ୍ତୀକରଣ ସମ୍ପର୍କରେ ସଚେତନ କରାଯାଇଥିଲା। ବାଲ୍ୟବିବାହ ଏକ ସାମାଜିକ ବ୍ୟାଧି, ଯାହା ବାଳିକାମାନଙ୍କ ଶିକ୍ଷା, ସ୍ୱାସ୍ଥ୍ୟ, ସ୍ୱାଧୀନତା ଓ ଭବିଷ୍ୟତର ସୁଯୋଗକୁ ପ୍ରଭାବିତ କରିଥାଏ। ପ୍ରତ୍ୟେକ ବାଳିକାଙ୍କର ଶିକ୍ଷା ଲାଭ କରିବା, ନିଜ ସ୍ୱପ୍ନ ପୂରଣ କରିବା, ନିଜ ଅଧିକାର ସମ୍ପର୍କରେ ଜାଣିବା ଏବଂ ସମ୍ମାନର ସହ ବଞ୍ଚିବାର ଅଧିକାର ରହିଛି। ତେଣୁ ବାଳିକାମାନଙ୍କ ଶିକ୍ଷା, ସୁରକ୍ଷା, ସ୍ୱାସ୍ଥ୍ୟ ଓ ଦକ୍ଷତା ବିକାଶରେ ନିବେଶ କରିବା ଏକ ସମାନତାଭିତ୍ତିକ ଓ ସଶକ୍ତ ସମାଜ ଗଠନର ମୁଖ୍ୟ ଆଧାର।
କାର୍ଯ୍ୟକ୍ରମରେ ନାଟକ, ସଚେତନତାମୂଳକ ବାର୍ତ୍ତା ଏବଂ ବିଭିନ୍ନ ଶିକ୍ଷଣୀୟ କାର୍ଯ୍ୟକଳାପ ମାଧ୍ୟମରେ ବାଲ୍ୟବିବାହ ବିରୋଧରେ ସାମୂହିକ ସଚେତନତା ସୃଷ୍ଟି କରିବା ସହିତ ଛାତ୍ରଛାତ୍ରୀମାନଙ୍କୁ ଏହି ସାମାଜିକ ସମସ୍ୟାର ମୁକାବିଲାରେ ସକ୍ରିୟ ଭୂମିକା ନେବାକୁ ଉତ୍ସାହିତ କରାଯାଇଥିଲା। ଏହି ସଚେତନତା କାର୍ଯ୍ୟକ୍ରମରେ ଅତିରିକ୍ତ ଡିସିପି ଶ୍ରୀ ସଞ୍ଜୟ ମହାପାତ୍ର, ଏଡିସିପି ଶ୍ରୀମତୀ ଆରତୀ ଗିରି, ଏସିପି ଶ୍ରୀ ଶରତ ଚନ୍ଦ୍ର ପାତ୍ର ଏବଂ ଏସିପି ଶ୍ରୀମତୀ ମମତା ନାୟକ ପ୍ରମୁଖ ଉପସ୍ଥିତ ଥିଲେ। ଏଥିସହ ଆଇୟୁସିଏଡବ୍ଲ୍ୟୁ (IUCAW) ଇନ୍ସପେକ୍ଟର ଦୁର୍ଗେଶ୍ୱରୀ ପ୍ରଧାନ ଓ ତାଙ୍କ ଟିମ୍ର ସଦସ୍ୟା ରୋଜାଲିନ ଭୋଇ ଏବଂ ଅନୁପମା କର ତଥା ଜଟଣୀ ଥାନା ଅଧିକାରୀ ଷ୍ଟାଲିନ କୁମାର ବିଶ୍ୱାଳ ଏବଂ ତାଙ୍କ ଟିମ୍ ଏହି ସମଗ୍ର କାର୍ଯ୍ୟକ୍ରମକୁ ସଫଳତାର ସହ ପରିଚାଳନା କରିଥିଲେ। ବାଲ୍ୟବିବାହ ରୋକିବା କେବଳ ପ୍ରଶାସନର ଦାୟିତ୍ୱ ନୁହେଁ; ଏହା ପରିବାର, ଶିକ୍ଷାନୁଷ୍ଠାନ ଓ ସମାଜର ପ୍ରତ୍ୟେକ ସଦସ୍ୟଙ୍କ ସାମୂହିକ ଦାୟିତ୍ୱ। ପ୍ରତ୍ୟେକ ବାଳିକାଙ୍କୁ ନିଜ ସ୍ୱପ୍ନ ପୂରଣ କରିବାର ସୁଯୋଗ ଦେବା ସହିତ ତାଙ୍କ ଅଧିକାରର ସୁରକ୍ଷା କରିବା ଆମ ସମସ୍ତଙ୍କ କର୍ତ୍ତବ୍ୟ।
