ଭୁବନେଶ୍ୱର: ଥାନାର ଦ୍ୱାରସ୍ଥ ହୋଇଛନ୍ତି ବିଧାୟକ । ପ୍ରେମିକାଙ୍କଠାରୁ ଛୁଟକାରା ପାଇବାକୁ ଥାନାର ଆଶ୍ରୟ ନେଇଛନ୍ତି ପାଲଲହଡା ବିଧାୟକ ମୁକେଶ ପାଲ । ପ୍ରେମିକାଙ୍କଠୁ ଛୁଟକାରା ପାଇବା ସହ ଭବିଷ୍ୟତର ବିବାଦରେ ନ ପସିବାକୁ ଆଗୁଆ ପଦକ୍ଷେପ ନେଇଛନ୍ତି ବିଧାୟକ । ସମୟ ଥିଲା ଯୁବତୀ ଭଲ ଲାଗୁଥିଲେ । ଯୁବତୀଙ୍କ ସହ ଘଣ୍ଟାଘଣ୍ଟା ପ୍ରେମାଳପ କରୁଥିଲେ, ବ୍ୟକ୍ତିଗତ ଭେଟଘାଟ ମଧ୍ୟ ହୋଇଥିଲା । କିନ୍ତୁ ପରବର୍ତ୍ତୀ ମୁହୂର୍ତ୍ତରେ ବିଧାୟକଙ୍କ ମୁଡ ଚେଞ୍ଜ ହୋଇଯାଇଥିଲେ ମଧ୍ୟ ପ୍ରେମିକା ଏହି ଚେଞ୍ଜକୁ ଗ୍ରହଣ କରିବାକୁ ନାରାଜ । ବିବାହ କରିବାକୁ ଅଡି ବସିଲେ । ଏମିତି ହେଲା କି ପ୍ରେମିକା ସିଧା ବିଧାୟକଙ୍କ ଘରେ ପହଞ୍ଚି ସେଠାରେ ହାଇଭୋଲ୍ଟର ଡ୍ରାମା କଲେ । ଏସବୁ ଦେଖି ବିଚାରା ବିଧାୟକ ନିଜ ଆସନକୁ ସୁରକ୍ଷିତ ରଖିବାକୁ କୁଆଡେ ଥାନାରେ ଏକ ମାମଲା ରୁଜୁ କରିଛନ୍ତି ।
ମିଳିଥିବା ସୂଚନା ଅନୁଯାୟୀ, ପାଲଲହଡାର ଯୁବ ବିଧାୟକ ମୁକେଶ ପାଲ ଅବିବାହିତ ଅଛନ୍ତି । ବିବାହ ପାଇଁ କନ୍ୟା ଖୋଜା ଚାଲିଛି । ଏପରି ସମୟରେ ଜଣେ ବନ୍ଧୁ ମୟୂରଭଞ୍ଜର ଜଣେ ଆଇନ ଛାତ୍ରୀଙ୍କ ସହ ବିବାହ ପ୍ରସ୍ତାବ ଆଣିଥିଲେ । ବିଧାୟକଙ୍କ ମନକୁ ପାଇଥିଲେ ଯୁବତୀ । ଏହାପରେ ଫୋନ ଯୋଗେ ବାର୍ତ୍ତାଳାପ, ପରେ ପ୍ରେମ ହୋଇଥିଲା । ଏପରି କି ବିବାହ ପାଇଁ ମଧ୍ୟ କୁଆଡେୁ ଯୁବତୀଙ୍କୁ ପ୍ରତିଶ୍ରୁତି ଦେଇଥିଲେ ବିଧାୟକ । କିଛି ମାସ ଚାଟିଂ, ପ୍ରେମାଳାପ, ଭେଟଘାଟ ହୋଇଥିଲା । କିନ୍ତୁ ହଠାତ୍ କଣ ହେଲା ବିଧାୟକଙ୍କ ମନ ପରିବର୍ତ୍ତନ ହେଲା । ସେହି ଯୁବତୀଙ୍କୁ ବିବାହ କରିବାକୁ ଇଛା ହେଲା ନାହିଁ । ତେଣୁ ବାର୍ତ୍ତାଳାପ ପରିମାଣ କମିଲା । ଏହାକୁ ନେଇ ଯୁବତୀ ବିଧାୟକଙ୍କୁ ସନ୍ଦେହ କରିବା ସହ ତୁରନ୍ତ ବିବାହ କରିବାକୁ ଚାପ ପକାଇଥିଲେ । କିନ୍ତୁ ବିଧାୟକ ବିବାହର ନାମ ଧରି ନ ଥିଲେ ।
ଏହାକୁ ନେଇ ପ୍ରଥମେ ଯୁବତୀ କୁଆଡେ ବିଧାୟକଙ୍କୁ ବ୍ଲାକମେଲ କରିବାକୁ ଚେଷ୍ଟା କରିଥିଲେ । ସେଥିରେ ମଧ୍ୟ କିଛି ହେଲା ନାହିଁ । ତେଣୁ ବାଧ୍ୟହୋଇ ଯୁବତୀ ଗତ ୨୫ ତାରିଖରେ ବିଧାୟକଙ୍କ ପାଲଲହଡା ବାସଭବନରେ ପହଞ୍ଚି ଯାଇଥିଲେ ଓ ପରିବାର ବର୍ଗଙ୍କ ଉପରେ ଚାପ ପକାଇଥିଲେ ତାଙ୍କୁ ବୋହୂ ଭାବେ ଗ୍ରହଣ କରିବାକୁ । ବିଧାୟକଙ୍କ ପରିବାର ବର୍ଗ ଯେତେ ବୁଝାଶୁଝା କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା । ଯୁବତୀ ନିଜ ଜିଦରେ ଥିଲେ ନଛୋଡ ବନ୍ଧା । ତେଣୁ ବାଧ୍ୟହୋଇ ବିଧାୟକ ପୁଲିସକୁ ସୂଚିତ କଲେ ଓ ପୁଲିସ ଆସି ଯୁବତୀଙ୍କୁ ନେଇଯାଇଥିଲା ଥାନାକୁ । ସେଠାରେ ବୁଝାଶୁଝା ହେଉ ବା ଅନ୍ୟ କୌଣସି ଉପାୟରେ ଯୁବତୀଙ୍କୁ ଜିଦକୁ କ୍ଷାନ୍ତକରି ଛଡାଯାଇଥିଲା ।
ହେଲେ, ବର୍ତ୍ତମାନ ଦଳ ତଥା ରାଜ୍ୟରେ ଯେଉଁ ପରିସ୍ଥିତି, କେତେବେଳେ କେଉଁ କଥା… ତେଣୁ ଭବିଷ୍ୟତରେ ଯୁବତୀଙ୍କ ପଟରୁ କାଳେ କୌଣସି ଭାବେ ଅଡୁଆର ସମ୍ମୁଖୀନ ହେବେ, ଏହି ଆଶଙ୍କାରେ ବିଧାୟକ ଥାନାରେ ଯୁବତୀଙ୍କ ନାମରେ ଏତଲା ଦେଇଛନ୍ତି । ଅବଶ୍ୟ ବିଧାୟକ ପୁଲିସକୁ ଉଭୟଙ୍କ ମଧ୍ୟରେ ଗଢିଉଠି ଥିବା ସମ୍ପର୍କ ସମ୍ବନ୍ଧରେ ଅବଗତ କରିଛନ୍ତି । ଉଭୟଙ୍କ ମଧ୍ୟରେ ଘଣ୍ଟାଘଣ୍ଟା ପ୍ରେମାଳପ ବିଷୟରେ କହିଛନ୍ତି । କିନ୍ତୁ ସବୁଠାରୁ ବଡ ପ୍ରଶ୍ନ, ଯେଉଁ ଯୁବତୀଙ୍କୁ ବିଧାୟକ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ, ଜଣେ ଜନପ୍ରତିନିଧି ହୋଇ ସମସ୍ତ ଦାୟିତ୍ୱକୁ ପଛରେ ପକାଇ ଘଣ୍ଟାଘଣ୍ଟା କଥା ହୋଇଥିଲେ ତଥା ଆଗକୁ କଣ କରିଥିଲେ ତାହା ତ ଉଭୟଙ୍କୁ ଜଣାଥିବ, ତେବେ ହଠାତ ମନ ପରିବର୍ତ୍ତନ ହେବା ଆଦୌ ଗ୍ରହଣୀୟ ନୁହେଁ ବୋଲି କୁହାଯାଉଛି । ସବୁଠାରୁ ବଡ ପ୍ରଶ୍ନ, ପ୍ରେମ ପକ୍ଷୀ ହୋଇ ଘଣ୍ଟାଘଣ୍ଟା କଥାହେବା, ବିବାହ ପାଇଁ ମନସ୍ଥିର କରିବା ପରେ ଏମିତି କଣ ହେଲା କି ଶେଷରେ ବିଧାୟକଙ୍କୁ ଥାନାର ଆଶ୍ରୟ ନେବାକୁ ପଡିଲା?
