ବସ ଓଲଟି ୫ ଗୁରୁତର ଆହତ

(ମହାଭାରତ, ବାରିପଦା): ବାରିପଦା ଅଭିମୁଖେ ଯାଉଥିବା ଏକ ଘରୋଇ ବସ ଆରପଟା ଛକ ନିକଟରେ ଦୁର୍ଘଟଣାଗ୍ରସ୍ତ ହୋଇଛି । ବସଟି ଭାରସାମ୍ୟ ହରାଇ ଏଠାରେ ଏକ ବିଲ ତଳକୁ ଓଲଟି ପଡିବାରୁ ଗାଡିରେ ଥିବା କିଛି ଯାତ୍ରୀ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ୫ ଜଣ ଗୁରୁତର ଆହତ ହୋଇଛନ୍ତି । ସେମାନଙ୍କୁ ଗୁରୁତର ଅବସ୍ଥାରେ ବାରିପଦା ମେଡିକାଲରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ, ଗତ ସୋମବାର ମହାଭାରତ ନାମକ ଏକ ଘରୋଇ ବସ ବଡସାହିରୁ ବାରିପଦା ଅଭିମୁଖେ ଯାଉଥିଲା । ବସରେ ପ୍ରାୟ ୭୦ ଜଣ ଯାତ୍ରୀ ଥିଲେ । ବସ୍ଟି ଆରପଟା ଛକ ନିକଟରେ ଭାରସାମ୍ୟ ହରାଇ ବିଲ ତଳକୁ ଖସି ପଡିଥିଲା । ଫଳରେ ଏଥିରେ ଥିବା କିଛି ଯାତ୍ରୀ ଆହତ ହୋଇଥିଲେ । ଆହତ ଯାତ୍ରୀମାନଙ୍କୁ ବଡସାହି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ହେବାରୁ ବାରିପଦା ମେଡିକାଲକୁ ସ୍ଥାନାନ୍ତର କରାଯାଇଥିଲା । ତେବେ ସେହି ଅଞ୍ଚଳରେ ଆମ୍ବୁଲାନ୍ସ ଠିକ ସମୟରେ ପହଞ୍ଚି ନପାରିବାରୁ କିଛି ଯାତ୍ରୀଙ୍କୁ ବଡସାହି ବିଧାୟକ ସନାତନ ବିଜୁଳିଙ୍କ ବ୍ୟକ୍ତିଗତ ଗାଡିରେ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବା ଦେଖିବାକୁ ମିଳିଥିଲା । ଦୁର୍ଘଟଣାରେ ଗୁରୁତର ଆହତ ହୋଇଥିବା ୫ ଯାତ୍ରୀ ବାରିପଦା ମେଡିକାଲରେ ଚିକିତ୍ସାଧୀନ ଅଛନ୍ତି ।