ଜାତୀୟ ସଙ୍ଗୀତ ‘ବନ୍ଦେ ମାତରମ୍’ର ସମ୍ପୂର୍ଣ୍ଣ ୬ଟି ଅନ୍ତରା ଗାଇବାକୁ ନେଇ ଉଠିଥିବା ଆଇନଗତ ବିବାଦ ଏବେ ସୁପ୍ରିମକୋର୍ଟରେ ପହଞ୍ଚିଛି। କର୍ଣ୍ଣାଟକ ସଙ୍ଗୀତଜ୍ଞ ତଥା ମ୍ୟାଗସେସେ ପୁରସ୍କାର ବିଜେତା ଟି.ଏମ୍. କ୍ରିଷ୍ଣାଙ୍କ ଆବେଦନ ଉପରେ ଶୁଣାଣି କରି କେନ୍ଦ୍ର ସରକାରଙ୍କୁ ଏହି ମାମଲାରେ ପକ୍ଷ ରଖିବାକୁ କହିଛନ୍ତି ସର୍ବୋଚ୍ଚ ଅଦାଲତ।
ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଓ ଜଷ୍ଟିସ୍ ଭି. ମୋହନାଙ୍କ ଖଣ୍ଡପୀଠ ମାମଲାର ଶୁଣାଣି କରିଛନ୍ତି। ଟି.ଏମ୍. କ୍ରିଷ୍ଣା ୨୦୨୬ରେ ସଂଶୋଧିତ ‘Prevention of Insults to National Honour Act, 1971’ ଏବଂ କେନ୍ଦ୍ର ଗୃହ ମନ୍ତ୍ରାଳୟର ସମ୍ପର୍କିତ ନିର୍ଦ୍ଦେଶକୁ ଚ୍ୟାଲେଞ୍ଜ କରିଛନ୍ତି।
ଆବେଦନରେ କ୍ରିଷ୍ଣା ଦର୍ଶାଇଛନ୍ତି ଯେ ‘ବନ୍ଦେ ମାତରମ୍’ର ଶେଷ ୪ଟି ଅନ୍ତରାରେ ହିନ୍ଦୁ ଦେବଦେବୀଙ୍କ ଉଲ୍ଲେଖ ରହିଛି। ତେଣୁ ଏହାକୁ ଗାଇବା ପାଇଁ କାହାକୁ ବାଧ୍ୟ କରାଯିବା ସମ୍ବିଧାନର ଧର୍ମନିରପେକ୍ଷତା ଓ ବିବେକ ସ୍ୱାଧୀନତା ସହ ଜଡ଼ିତ ପ୍ରଶ୍ନ ଉଠାଉଛି ବୋଲି ସେ ଯୁକ୍ତି ଦେଇଛନ୍ତି।
ଶୁଣାଣି ସମୟରେ କ୍ରିଷ୍ଣାଙ୍କ ପକ୍ଷରୁ ବରିଷ୍ଠ ଆଇନଜୀବୀ ଡକ୍ଟର ଏସ୍. ମୁରଲୀଧର ଯୁକ୍ତି ରଖିଥିଲେ। ଏହି ସମୟରେ ସଲିସିଟର ଜେନେରାଲ୍ ତୁଷାର ମେହେଟାଙ୍କ ଏକ ‘ନକ୍ସଲ’ ସମ୍ବନ୍ଧୀୟ ମନ୍ତବ୍ୟକୁ ନେଇ ଦୁଇ ପକ୍ଷର ଆଇନଜୀବୀଙ୍କ ମଧ୍ୟରେ ବାକ୍ବିତଣ୍ଡା ହୋଇଥିଲା। ମୁରଲୀଧର ମନ୍ତବ୍ୟ ପ୍ରତ୍ୟାହାର କରିବାକୁ କହିଥିବାବେଳେ ମେହେଟା ନିଜ ମନ୍ତବ୍ୟରେ ଅଟଳ ରହିଥିଲେ। ତେବେ ଏହି ମନ୍ତବ୍ୟକୁ କୋର୍ଟ ରେକର୍ଡରେ ନେଉନାହାନ୍ତି ବୋଲି ଖଣ୍ଡପୀଠ ସ୍ପଷ୍ଟ କରିଥିଲେ।
ସୁପ୍ରିମକୋର୍ଟ କହିଛନ୍ତି ଯେ ‘ବନ୍ଦେ ମାତରମ୍’ରେ କେତେ ଅନ୍ତରା ରହିବ, ତାହା ନିର୍ଦ୍ଧାରଣ କରିବା କୋର୍ଟର କାମ ନୁହେଁ। ତେବେ ଧାର୍ମିକ କିମ୍ବା ବିବେକଗତ କାରଣରୁ କେହି ଏହା ଗାଇବାକୁ ମନା କଲେ, ତାଙ୍କ ବିରୋଧରେ ଦଣ୍ଡନୀୟ କାର୍ଯ୍ୟାନୁଷ୍ଠାନ ହୋଇପାରିବ କି ନାହିଁ, ସେ ଦିଗକୁ ଅଦାଲତ ପରୀକ୍ଷା କରିବେ।
ଏହି ପରିପ୍ରେକ୍ଷୀରେ ୧୯୮୬ର ‘Bijoe Emmanuel’ ମାମଲାରେ ସୁପ୍ରିମକୋର୍ଟ ସ୍ୱୀକାର କରିଥିବା ବିବେକ ସ୍ୱାଧୀନତାର ସିଦ୍ଧାନ୍ତ ଏବେ ମଧ୍ୟ ପ୍ରଯୁଜ୍ୟ କି ନାହିଁ, ତାହା ମଧ୍ୟ ଅଦାଲତ ବିଚାର କରିବେ।
