ବିଜେପିରେ ଯୋଗଦାନ ଖବର କପୋଳକଳ୍ପିତ: କଂଗ୍ରେସ ନେତା ସୁଦର୍ଶନ ଦାସ

(ଅଜିତ କୁମାର ସାହୁ/ଜଳେଶ୍ୱର): କଂଗ୍ରେସର ବରିଷ୍ଠ ନେତା ସୁଦର୍ଶନ ଦାସଙ୍କ ବିଜେପିରେ ଯୋଗ ଦାନ ଖବର କପୋଳ କଳ୍ପିତ ବୋଲି ଆଜି ଏକ ସାମ୍ବାଦିକ ସମ୍ମିଳନୀ କରି ସେ ସୂଚନା ଦେଇଛନ୍ତି । ସେ ଆଦର୍ଶଗତ ବିଚାରଧାରାକୁ ନେଇ ରାଜନୀତିକୁ ଆସିଛନ୍ତି । ଆଜି ସେ କଂଗ୍ରେସ ସହ ଅଛନ୍ତି ଏବଂ ଆଗକୁ ମଧ୍ୟ ରହିବେ ବୋଲି କହିଛନ୍ତି । ବିଜେପି ଏକଛତ୍ରବାଦ ଏବଂ କେନ୍ଦ୍ରୀଭୁତ ରାଜନୀତିରେ ବିଶ୍ୱାସ କରେ । ନିଜ ନିଜ ରାଜନୈତିକ ବିଚାରଧାରାକୁ ନେଇ ଏହି ୨ଟି ଦଳ ଉତ୍ତର ଓ ଦକ୍ଷିଣ ମେରୁ ସଦୃଶ । ଏଣୁ ସେ ବିଜେପିରେ ଯୋଗ ଦେଇ ନିଜର ଆଦର୍ଶଗତ ମୂଲ୍ୟବୋଧକୁ ଜଳାଞ୍ଜଳି ଦେବେ ନାହିଁ ବୋଲି କହିଛନ୍ତି । ସୂଚନାଯେ।।ଗ୍ୟ, କିଛି ଦିନ ତଳେ ଜଳେଶ୍ୱରରେ ବିଜେପି ସାଂସଦ ପ୍ରତାପ ଷଡଙ୍ଗୀଙ୍କ ସହ ତାଙ୍କର ଏକ ସୌଜନ୍ୟମୂଳକ ସାକ୍ଷାତ ହୋଇଥିଲା । ଏହି ସମୟରେ ସେ କିଛି ସମସ୍ୟାକୁ ନେଇ ଆଲୋଚନା କରିଥିଲେ । ଦୁଇ ଦଳର ନେତାଙ୍କ ଏଭଳି ସୌଜନ୍ୟମୂଳକ ସାକ୍ଷାତକାରକୁ ନେଇ ଏକ ନିର୍ଦ୍ଦିଷ୍ଟ ଗଣମାଧ୍ୟମରେ ସେ ବିଜେପିରେ ଯୋଗ ଦେଉଥିବା ଖବର ପ୍ରକାଶ ପାଇଥିଲା । ଏଣୁ ଏହି ଖବରକୁ କଂଗ୍ରେସ ନେତା ସୁଦର୍ଶନ ମନଗଢା ବା କପୋଳକଳ୍ପିତ ବୋଲି କହିବା ସହ ଏଭଳି ଖବର ପ୍ରକାଶନକୁ ନେଇ ସେ ଗଭୀର ମର୍ମାହତ ବୋଲି ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଉକ୍ତ ସମ୍ମିଳନୀରେ ଜଳେଶ୍ୱର ଯୁବ କଂଗ୍ରେସ ସଭାପତି ଗିରିଜା ଶଙ୍କର ଦାସ, ପୂର୍ବତନ କାଉନସିଲର ଜଗଦିଶ ନନ୍ଦି, ପୂର୍ବତନ ସରପଞ୍ଚ ହେମନ୍ତ ଗିରି ପ୍ରମୁଖ ଯୋଗ ଦେଇଥିଲେ ।