ଜଳବନ୍ଦୀ ଭିତରେ ଚାଲିଛି ଚିକିତ୍ସା ସେବା

(ଅଜିତ ସାହୁ/ଜଳେଶ୍ୱର): ଲଘୁଚାପ ଜନିତ ଲଗାଣ ବର୍ଷାରେ ପ୍ରଭାବିତ ହୋଇଛି ରାଜ୍ୟର ଅନେକ ଜିଲ୍ଲା । ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକର ବିଭିନ୍ନ ଅଞ୍ଚଳ ଏବେ ଜଳବନ୍ଦୀ। ତେବେ ଏହି ଜଳବନ୍ଦୀ ଭିତରେ ଚାଲିଛି ଚିକିତ୍ସା ସେବା । ବ୍ଲକ ଅନ୍ତର୍ଗତ ଲକ୍ଷମଣନାଥ ସୀମାନ୍ତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ବର୍ଷା ପାଣି ପଶିଥିବା ବେଳେ ଏଠାରେ ଚିକିତ୍ସା ସେବା ବ୍ୟାହତ ହୋଇନାହିିଁ । ସ୍ୱାସ୍ଥ୍ୟ କେନ୍ଦ୍ରଟି ସ୍ଥାପନା ହେବାର ୨୬ ବର୍ଷ ପୁରିଥିଲେ ବି ଆଜି ମଧ୍ୟ ଅବହେଳିତ ଅବସ୍ଥାରେ ପଡିରହିଛି । ଚଳିତ ବର୍ଷ ଲଘୁଚାପ ଜନିତ ବର୍ଷାରେ ବେହାଲ ହୋଇପଡିଛି ଜଲେଶ୍ୱର ସହର ଏବଂ ଆଖପାଖ ଅଞ୍ଚଳ। ଓଡିଶା ଓ ପଶ୍ଚିମବଙ୍ଗର ସୀମାରେ ଥିବା ଲକ୍ଷମଣନାଥ ସୀମାନ୍ତ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଓ ଷ୍ଟାଫ କ୍ୱାର୍ଟର ଭିତରେରେ ଲହଡି ଭାଙ୍ଗୁଛି ଆଣ୍ଠୁଏ ଉଚ୍ଚର ନାଳ ମର୍ଦମାର ପାଣି । ଅପରିଷ୍କାର ପାଣି ସହିତ ମେଡିକାଲ ପରିସରରେ ବୁଲୁଛନ୍ତି ମାଳ ମାଳ ବେଙ୍ଗ,ବିଛା ଓସାପ । ଉକ୍ତ ମେଡିକାଲ ଉପରେ ଚିକିତ୍ସା ପାଇଁ ପଡୋଶୀ ପଶ୍ଚିମବଙ୍ଗ, ରାଇବଣିଆ ଓ ଆଖପାଖ ଅଞ୍ଚଳର ୧୦ଟି ପଞ୍ଚାୟତର ବାସିନ୍ଦା ନିର୍ଭର କରିଥାନ୍ତି। ଏହି ସ୍ୱାସ୍ଥ୍ୟକେନ୍ଦ୍ରର ଆଣ୍ଠୁଏ ଲେଖାଏ ପାଣି ଭିତରେ ଚିକିତ୍ସାସେବା ଯୋଗାଉଛନ୍ତି କାର୍ୟ୍ୟରତ ଆୟୁଷ ଡାକ୍ତର ଦୀନକୃଷ୍ଣ ଜେନା । ଗୋଟିଏ ପଟେ ସରକାର କରୋନା ମୁକାବିଲା କରୁଥିବା ଡାକ୍ତର ଓ ସ୍ୱାସ୍ଥ୍ୟ କର୍ମୀମାନଙ୍କୁ କରୋନା ଯୋଦ୍ଧାର ମାନ୍ୟତା ଦେଇଥିବା ବେଳେ ସ୍ୱାସ୍ଥ୍ୟ ସେବା ପ୍ରତି ଅଧିକ ଗୁରୁତ୍ୱ ଦେଉଥିବାର ଡ଼ିଡ଼ିମ୍ବ ପିଟୁଛନ୍ତି। ମାତ୍ର ବାସ୍ତବ ଚିତ୍ର କିନ୍ତୁ ପୁରାପୁରି ଓଲଟା । ଲଗାଣ ବର୍ଷା ଯୋଗୁ ପାଣି ଜମି ରହିବା ଫଳରେ ମେଡିକାଲ ପରିସର କେତେ ସୁରକ୍ଷିତ ସେ ନେଇ ସାଧାରଣରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । ତେବେ ମେଡିକାଲ ପରିସରରୁ ପାଣି ନିଷ୍କାସନ ପାଇଁ ସ୍ଥାୟୀ ସମାଧାନ କେବେ ହେଉଛି ତାହା ଦେଖିବାକୁ ବାକି ରହିଲା।