ଋଥଯାତ୍ରା : ସପ୍ତମ ପର୍ୟ୍ୟାୟରେ ପହଞ୍ଚିଲା ରଥକାଠ

(ଜୟନ୍ତ ସେଠି/ଗୋପ): ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ପୁରୀରେ ପହଞ୍ଚିଲା ରଥକାଠ । ସପ୍ତମ ପର୍ୟ୍ୟାୟରେ ଏହି ରଥ କାଠ ଆସି ପହଞ୍ଚିଛି । ଏଥିରେ ମୋଟ ୨୦ ଖଣ୍ଡ କାଠ ରହିଥିବାବେଳେ ୧୯ଟି ଧଉରା ଓ ଗୋଟିଏ ଅସନ କାଠ ଆସିଛି । ଏହା ଉତ୍ତର ଘୁମୁସର ବନଖଣ୍ଡ, ଭଞ୍ଜନଗରରୁ ଏକ ଟ୍ରକ ଯୋଗେ ଆସିଛି । ଆସନ୍ତା ୨୬ ତାରିଖରେ ଅକ୍ଷୟ ତୃତୀୟାରେ ୩ ରଥର ନିର୍ମାଣ କାର୍ୟ୍ୟ ଅନୁକୂଳ ହେବ। ତେବେ ଲକ ଡାଉନ ଚାଲୁଥିବା ବେଳେ କୋରୋନା ସଂକ୍ରମଣକୁ ଦୃଷ୍ଟିରେ ରଖି ଚଳିତ ବର୍ଷ ରଥ ଯାତ୍ରା ଅୟୋଜନ ନେଇ ବିଭିନ୍ନ ମହଲରେ ଅନେକ ଆଶଙ୍କା ପ୍ରକାଶ ପାଇଛି । ୧୯୩ ଖଣ୍ଡ କାଠ ପୂର୍ଵ ବର୍ଷ ଠାରୁ ଶ୍ରୀ ମନ୍ଦିର ପ୍ରଶାସନ ପାଖରେ ଗଚ୍ଛିତ ରହିଛି । ଚଳିତ ବର୍ଷ ୬୭୨ ଖଣ୍ଡ କାଠ ର ଆବଶ୍ୟକତା ରହିଛି । ପୂର୍ବରୁ ଷଷ୍ଠ ପର୍ୟ୍ୟାୟ ସୁଧା ବଡଦାଣ୍ଡରେ ୨୨୪ ଖଣ୍ଡ କାଠ ପହଞ୍ଚି ସାରିଛି । ସେହିପରି ସପ୍ତମ ପର୍ୟ୍ୟାୟରେ ଆଉ ୨୦ ଖଣ୍ଡ କାଠ ପହଞ୍ଚିଛି। ବାକି ଅନ୍ୟ କାଠ ପର୍ୟ୍ୟାୟ କ୍ରମେ ଆସି ପହଞ୍ଚିବ।