(ସମ୍ବଲପୁର) : ମୃତ୍ୟୁ ପରେ ଆସିଲାନି ପରିବାର । ଶବ ସତ୍କାର କଲା ପ୍ରଶାସନ ଓ ଏନଜିଓ । ଶବକୁ କାନ୍ଧରେ ବୋହିନେବା ସହ ମୁଖାଗ୍ନି ଦେଇଛନ୍ତି ଏମିତି ଏକ ମହାନ ଦୃଶ୍ୟ ଦେଖଇବାକୁ ମିଳିଛି ସମ୍ବଲପୁରରେ । ବ୍ୟକ୍ତିଙ୍କ ମୃତ୍ୟୁ ପରେ ଶବ ନେବାକୁ ପରିବାର ଲୋକ ମନା କରିଦେବା ପରେ ପ୍ରଶାସନ ଅଣ୍ଟା ଭିଡିଛି । ସମସ୍ତ କାର୍ଯ୍ୟରେ ସାମିଲ ହୋଇଥିଲେ ଏସ୍ଏମ୍ସି କମିଶନର, କର୍ମଚାରୀ ଓ ସ୍ୱେଚ୍ଛାସେବୀ ।
ସୂଚନାନୁଯାୟୀ , ବ୍ୟକ୍ତି ଜଣକ ହେଉଛନ୍ତି କେରଳର ପଦ୍ମା ନାୟାର । ସେ ୧୯୯୮ ମସିହାରୁ ହୀରାକୁଦରେ ଥିବା ଏକ ସ୍କୁଲରେ ସହକାରୀ ଶିକ୍ଷକ ଥିଲେ । ସମ୍ବଲପୁର ମହାନଗର ନିଗମ ଘୋଷଣା ହେବା ପରେ ଓ ଉକ୍ତ ସ୍କୁଲ ଶିକ୍ଷା ବିଭାଗରେ ମିଶ୍ରଣ ପରେ ତାଙ୍କୁ ଏସ୍ଏମ୍ସି କାର୍ଯ୍ୟାଳୟରେ କିରାଣୀ ଭାବେ ନିଯୁକ୍ତି ଦିଆଯାଇଥିଲା । ଗତ କରୋନା ସମୟରେ ସେ କେରଳର ତାଙ୍କ ପରିବାର ନିକଟକୁ ଫେରିବାକୁ ଚାହୁଁଥିଲେ, କିନ୍ତୁ ତାହା ସମ୍ଭବ ହୋଇନଥିଲା । ଆସନ୍ତା ୨୦୧୪ ରେ ପଦ୍ମା ଚାକିରୀରୁ ଅବସର ଗ୍ରହଣ କରିଥାନ୍ତେ । କିନ୍ତୁ ଗତ ୨ ରୁ ୩ ମାସ ହେଲା ସେ ଚଲାବୁଲା କରିପାରୁନଥିଲେ । ପରେ ପରେ ତାଙ୍କର ମାନସିକ ସମସ୍ୟା ସୃଷ୍ଟି ହୋଇଥିଲା । ତାଙ୍କର ମୃତ୍ୟୁ ପରେ ଅନ୍ତିମ ସଂସ୍କାର ପାଇଁ ପରିବାର ଲୋକ ଆସିଲେନି ।
