ଭାରତର ଶିକ୍ଷା ବ୍ୟବସ୍ଥା ଛାତ୍ରଛାତ୍ରୀଙ୍କ ଭବିଷ୍ୟତ ଗଢ଼ୁଛି ନା ଶୋଷଣର ନୂଆ ମଡେଲ୍ ସୃଷ୍ଟି କରୁଛି ? ଏହି ପ୍ରଶ୍ନକୁ ନେଇ ଦେଶବ୍ୟାପୀ ଆରମ୍ଭ ହୋଇଛି କଂଗ୍ରେସର “ଛାତ୍ରୋ କି ଗୁଞ୍ଜ” ଅଭିଯାନ। ବିରୋଧୀ ଦଳ ନେତା ରାହୁଲ ଗାନ୍ଧୀ ଅଭିଯୋଗ କରିଛନ୍ତି ଯେ ବର୍ତ୍ତମାନର ଶିକ୍ଷା ବ୍ୟବସ୍ଥା ଛାତ୍ରଛାତ୍ରୀଙ୍କ ସ୍ୱପ୍ନକୁ ପୂରଣ କରିବା ବଦଳରେ ସେମାନଙ୍କ ଉପରେ ଆର୍ଥିକ ଓ ମାନସିକ ଚାପ ବଢ଼ାଉଛି। ନିଟ୍, ୟୁପିଏସସି ଭଳି ପ୍ରତିଯୋଗିତାମୂଳକ ପରୀକ୍ଷାକୁ ନେଇ ଲକ୍ଷ ଲକ୍ଷ ଛାତ୍ରଛାତ୍ରୀ ଅନିଶ୍ଚିତତା ଓ ଚିନ୍ତାରେ ଜୀବନ କାଟୁଥିବା ବେଳେ ରୋଜଗାର ସୁଯୋଗ ମଧ୍ୟ ସୀମିତ ରହିଛି।
ପୁରୀ ଜିଲ୍ଲା କଂଗ୍ରେସ କମିଟି ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଦଳ କହିଛି ଯେ ଶିକ୍ଷା କ୍ଷେତ୍ରରେ ବେସରକାରୀକରଣ ବଢ଼ିବା ସହ ସାଧାରଣ ଓ ଗରିବ ପରିବାରର ଛାତ୍ରଛାତ୍ରୀଙ୍କ ପାଇଁ ଉଚ୍ଚଶିକ୍ଷା ଦିନକୁ ଦିନ ଦୁର୍ଲଭ ହେଉଛି। ଏହାର ପ୍ରତିବାଦରେ ଏବଂ ଶିକ୍ଷା ବ୍ୟବସ୍ଥାରେ ମୌଳିକ ପରିବର୍ତ୍ତନ ଦାବିରେ କଂଗ୍ରେସ ଦେଶବ୍ୟାପୀ ଏହି ଅଭିଯାନ ଆରମ୍ଭ କରିଛି।
