ସ୍ତ୍ରୀ ଫୋନ ନ ଉଠାଇବାରୁ ଦେହରେ ନିଆଁ ଲଗାଇଲେ ସ୍ୱାମୀ

(ମହାଭାରତ, ବାଲେଶ୍ୱର): ବାଲେଶ୍ୱର ଜିଲ୍ଲା ନୀଳଗିରି ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି । ପତ୍ନୀ ଫୋନ ନ ଉଠାଇବାରୁ ସ୍ୱାମୀ ତାଙ୍କ ଦେହରେ ନିଆଁ ଲଗାଇ ଦେଇଥିବା ଜଣାପଡିଛି । ନିଆଁ ଲଗାଇଥିବା ସ୍ୱାମୀ ନୀଳଗିରି ଅଞ୍ଚଳର ଗୋପାଳ ସିଂ ବୋଲି ଜାଣିବାକୁ ମିଳିଛି । ମିଳିଥିବା ଖବର ଅନୁଯାୟୀ, କୌଣସି କାରଣରୁ ଗୋପାଳଙ୍କର ତାଙ୍କ ସ୍ତ୍ରୀଙ୍କ ସହ ଝଗଡା ହୋଇଥିଲା । ଫଳରେ ୨-୩ ଦିନ ପୂର୍ବେ ତାଙ୍କ ସ୍ତ୍ରୀ ଶାଶୂ ଘର ଛାଡି ସମ୍ପର୍କୀୟଙ୍କ ଘରକୁ ପଳାଇଥିଲେ । ତେବେ ଶନିବାର ଦିନ ଗୋପାଳ ଯେତେବେଳେ ସ୍ତ୍ରୀଙ୍କୁ ଫୋନ କରିଥିଲେ । ସେ ଫୋନ ଉଠାଇ ନଥିଲେ । ଏଥିରେ ଉତ୍ତ୍ୟକ୍ତ ହୋଇ ଗୋପାଳ ଘରର କବାଟ ବନ୍ଦ କରି ନିଜ ଦେହରେ ନିଆଁ ଲଗାଇ ଦେଇଥିଲେ । ଏହାପରେ ସେ ଜୋରରେ ଚିତ୍କାର କରିଥିଲେ । ତାଙ୍କ ଚିତ୍କାର ଶୁଣି ଗାଁ ଲୋକେ କବାଟ ଭାଙ୍ଗି ତାଙ୍କୁ ଉଦ୍ଧାର କରିଥିଲେ । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ଗୋପାଳଙ୍କୁ ପ୍ରଥମେ ନୀଳଗିରିରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।