(ମହାଭାରତ, ଚିଲିକା): ଘନ କୁହୁଡି ଯୋଗୁଁ ଚିଲିକାରେ ପ୍ରାୟ ୩ ଘଣ୍ଟାରୁ ଉଦ୍ଧ୍ୱର୍ ସମୟ ଧରି ଏକ ଯାତ୍ରୀବାହୀ ଡଙ୍ଗା ଫସି ରହିଥିବା ଦେଖାଯାଇଛି । ଡଙ୍ଗାଟି ସାତପଡାରୁ ଜହ୍ନିକୁଦା ଅଭିମୁଖେ ଯାଉଥିବା ବେଳେ ନାଉରିଆ ବାଟ ନ ଜାଣିପାରିବାରୁ ଡଙ୍ଗାଟି ଚିଲିକା ମଝିରେ ଫସି ରହିଥିଲା । କୁହୁଡି ଛାଡିବା ପରେ ଡଙ୍ଗାଟି ଗନ୍ତବ୍ୟସ୍ଥଳ ଅଭିମୁଖେ ବାହାରି ଜହ୍ନିକୁଦରେ ପହଞ୍ଚିଥିବା ଜଣାଯାଇଛି । ତେବେ ଡଙ୍ଗାରେ ୩୦ ଜଣ ଯାତ୍ରୀ ଓ ୧୦ଟି ବାଇକ ଥିବା ସୂଚନା ମିଳିଛି । ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି ।
ମିଳିଥିବା ସୂଚନା ଅନୁଯାୟୀ, ଡଙ୍ଗାଟି ଗୁରୁବାର ସକାଳୁ ସାତପଡା ଛାଡିଥିଲା । ପ୍ର।।ୟ ୧ କିମି ଯିବା ପରେ ଘନ କୁହୁଡି ଯୋଗୁ ନାଉରିଆ ବାଟବଣା ହୋଇଯାଇଥିଲେ । ଫଳରେ ମହିଷା ବ୍ରହ୍ମପୁର ନିକଟସ୍ଥ ଏକ ଗାଁ ପାଖରେ ଡଙ୍ଗାଟି ଫସି ଯାଇଥିଲା । ସେଠାରେ କିଛି ସମୟ ଅଟକି ରହି କୁହୁଡି ଛାଡିବା ପରେ ଦିନ ୯ଟାରେ ଡଙ୍ଗାଟି ଗନ୍ତବ୍ୟସ୍ଥଳ ଅଭିମୁଖେ ବାହାରିଥିଲେ । ୧୦ଟା ବେଳକୁ ଜହ୍ନିକୁଦରେ ଡଙ୍ଗାଟି ପହଞ୍ଚିଥିଲା । ଦୀର୍ଘ ସମୟ ଧରି ମଝି ଚିଲିକାରେ ଡଙ୍ଗାଟି ଫସି ରହିଥିଲେ ମଧ୍ୟ ଏ ସମ୍ପର୍କରେ ପ୍ରଶାସନ ନିକଟରେ ମଧ୍ୟ କୌଣସି ଖବର ନଥିଲା । ଗଣମାଧ୍ୟମରେ ଖବର ପ୍ରସାରିତ ହେବା ପରେ ଅଗ୍ନିଶମ ଗାଡି ଜହ୍ନିକୁଦରେ ପହଞ୍ଚିଥିଲା । କିନ୍ତୁ ସେତେବେଳକୁ ଡଙ୍ଗାଟି କୂଳରେ ପହଞ୍ଚି ସାରିଥିଲା ।
