ଗାଁକୁ ଆମ୍ବୁଲାନ୍ସ ଆସି ନପାରି ଶିଶୁ ପୁତ୍ରର ମୃତ୍ୟୁ

(ବନବାସୀ ପ୍ରଧାନ/ବାଲିଗୁଡା): କଣ୍ଟେନମେଣ୍ଟ ଯୋଗୁ ଗାଁ ଭିତରକୁ ଆମ୍ବୁଲାନ୍ସ ଆସି ନ ପାରି ଜଣେ ଶିଶୁର ଜୀବନ ଚାଲିଗଲା । ମୃତ୍ୟୁ ପରେ ବି ଡାକ୍ତରଖାନାରୁ ଘରକୁ ଶବ ଆଣିବା ଲାଗି ଆମ୍ବୁଲାନ୍ସ କିମ୍ବା ମହାପ୍ରୟାଣ ଗାଡି ବି ମିଳିଲା ନାହିଁ । ଶେଷରେ ପରିବାର ଲୋକେ ଶବକୁ ବାଇକ ଯୋଗେ ଘରକୁ ନେବାକୁ ବାଧ୍ୟ ହେବାକୁ ପଡିଛି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ରାଇକିଆ ବ୍ଲକ ଅଞ୍ଚଳରେ । ବ୍ଲକ ଅନ୍ତର୍ଗତ ସୁଗଡବାଡ଼ି ଗାଁର ବାସିନ୍ଦା ମୁନାଙ୍କ ୭ ବର୍ଷର ପୁଅ ବାଲେଙ୍କେଶ୍ୱରର ଦେହ ଅସୁସ୍ଥ ଥିବାରୁ ସେ ଆମ୍ବୁଲାନ୍ସ ଡକାଇଥିଲେ । କିନ୍ତୁ ପାଟୁଳି ଠାରେ ବ୍ଲକ ପ୍ରଶାସନ ତରଫରୁ କଣ୍ଟେନମେଣ୍ଟ ଜୋନ ପାଇଁ ରାସ୍ତା ବନ୍ଦ କରାଯାଇଥିଲା । ଫଳରେ ଆମ୍ବୁଲାନ୍ସଟି ସେଠି ଅଟକି ରହିବା ସହ ଗାଁ ଭିତରକୁ ଯାଇ ପାରିନଥିଲା । ଅସୁସ୍ଥ ପୁଅକୁ ଧରି ପରିବାର ଲୋକେ ବାଧ୍ୟ ହୋଇ ପାଖାପାଖି ୪ କିଲୋମିଟର ଚାଲି ଚାଲି ଆସି ଅଧ ଘଣ୍ଟା ପରେ ଆମ୍ବୁଲାନ୍ସ ନିକଟରେ ପହଞ୍ଚିଥିଲେ । ରାଇକିଆ ଡାକ୍ତରଖାନାରେ ଅସୁସ୍ଥ ପୁଅକୁ ଦେଖିବା ପରେ ଚିକିତ୍ସା କରୁଥିବା ଡାକ୍ତର ଜଣକ ଅଧିକ ଚିକିତ୍ସା ଲାଗି ଫୁଲବାଣୀ ନେଇ ଯିବାକୁ କହିଥିଲେ । କିନ୍ତୁ କିଛି ସମୟ ପରେ ଅସୁସ୍ଥ ବାଲେଙ୍କେଶ୍ୱରର ମୃତ୍ୟୁ ହୋଇଥିଲା । ପୁଅର ଶବକୁ ଆଣିବା ଲାଗି ଡାକ୍ତରଖାନା ତରଫରୁ ଆମ୍ବୁଲାନ୍ସ କିମ୍ବା ମହାପ୍ରୟାଣ ଗାଡି ମିଳିନଥିଲା । ପରେ ପରିବାର ଲୋକେ ବାଇକ ଯୋଗେ ଘରକୁ ମୃତ ଶିଶୁପୁତ୍ରର ମରଶରୀର ନେଇ ଆସିଥିଲେ । ସ୍ଥାନୀୟ ପ୍ରଶାସନ ମୁଖ୍ୟ ରାସ୍ତାରେ ରାସ୍ତା ବନ୍ଦ କରିବା ଯୋଗୁ ଶିଶୁଟିର ଜୀବନ ଚାଲିଗଲା ବୋଲି ପରିବାର ଲୋକେ ଅଭିଯୋଗ କରିଛନ୍ତି । ରାଇକିଆ ବ୍ଲକ ପ୍ରଶାସନର ଏଭଳି ରାସ୍ତା ବନ୍ଦ ଯୋଗୁ ଶିଶୁଟିର ସଠିକ ସମୟରେ ଚିକିତ୍ସା ହୋଇ ପାରିଲା ନାହିଁ ବୋଲି ଅଞ୍ଚଳବାସୀ ମଧ୍ୟ ଅଭିଯୋଗ କରିଛନ୍ତି । କିନ୍ତୁ ଏ ନେଇ ବ୍ଲକ ପ୍ରଶାସନ ତରଫରୁ କୌଣସି ପ୍ରତିକ୍ରିୟା ମିଳିପାରିନାହିଁ ।