(ଦିଲ୍ଲୀ) : କୁହୁଡ଼ି ଯୋଗୁଁ ଦିଲ୍ଲୀ ସମେତ ୬ଟି ରାଜ୍ୟର ବିମାନବନ୍ଦରରେ ଶୂନ୍ୟ ଦୃଶ୍ୟମାନତା (ଜିରୋ ଭିଜିବିଲିଟି) ରେକର୍ଡ କରାଯାଇଛି। ପାଣିପାଗ ବିଭାଗ (ଆଇଏମ୍ଡି) ଅନୁଯାୟୀ, ରାଜଧାନୀ ଦିଲ୍ଲୀ ଏବଂ ପାଲମ ବିମାନବନ୍ଦର ବ୍ୟତୀତ ପଞ୍ଜାବର ଅମୃତସର, ଉତ୍ତରପ୍ରଦେଶର ଆଗ୍ରା ଓ ପ୍ରୟାଗରାଜ, ମଧ୍ୟପ୍ରଦେଶର ଗ୍ୱାଲିୟର, ରାଜସ୍ଥାନର ଜୈସଲମେରରେ ଶୂନ୍ୟ ଦୃଶ୍ୟମାନତା ରେକର୍ଡ କରାଯାଇଛି।
ସୂଚନାନୁଯାୟୀ , ଦିଲ୍ଲୀ ବ୍ୟତୀତ ଉତ୍ତରପ୍ରଦେଶ, ପଞ୍ଜାବ, ହରିୟାଣା, ରାଜସ୍ଥାନରେ ମଧ୍ୟ ଘନ କୁହୁଡ଼ି ଲାଗି ରହିଛି। ପାଣିପାଗ ବିଭାଗ କହିଛି ଯେ ନୂଆବର୍ଷରେ ଶୀତ ବଢ଼ିପାରେ। ଡିସେମ୍ବର ୨୫ରୁ ୨୮ ମଧ୍ୟରେ ଦିଲ୍ଲୀ, ହରିୟାଣା, ପଞ୍ଜାବ ଓ ଚଣ୍ଡୀଗଡ଼ରେ କୁହୁଡ଼ି ବଢ଼ିବ। ପଞ୍ଜାବ ଓ ହରିୟାଣାରେ ଶୀତ ଲହରି ସତର୍କ ସୂଚନା ଜାରି କରାଯାଇଛି। ପାଣିପାଗ ବିଭାଗ ପକ୍ଷରୁ ଦେଶର କୁହୁଡ଼ି ମାନଚିତ୍ର ଜାରି କରାଯାଇଛି। ଏଥର ନୂଆବର୍ଷ ଆରମ୍ଭରେ ବର୍ଷା ହେବାର ସମ୍ଭାବନା ରହିଛି।
