ରାୟଗଡା: ରାୟଗଡାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣୀଙ୍କ ମନ୍ଦିରର ଦାନ ହୁଣ୍ଡି ଦୀର୍ଘ ୬ ମାସ ପରେ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଖୋଲାଯାଇଛି। ମନ୍ଦିର ପରିସରରେ ଥିବା ୯ଟି ଦାନ ହୁଣ୍ଡିରୁ ପୁଳା ପୁଳା ନଗଦ ଟଙ୍କା ସହ ସୁନା, ରୂପା ଓ ବିଭିନ୍ନ ଅଳଙ୍କାର ମିଳିଛି। ହୁଣ୍ଡି ଖୋଲିବା ପରେ ମନ୍ଦିର ପରିଚାଳନା କମିଟି, ବ୍ୟାଙ୍କ କର୍ମଚାରୀ ଓ ବିଭିନ୍ନ କମିଟିର ସଦସ୍ୟମାନଙ୍କ ଉପସ୍ଥିତିରେ ଦାନ ସାମଗ୍ରୀର ଗଣତି ଆରମ୍ଭ ହୋଇଛି। ଏହି ଗଣତି କାର୍ଯ୍ୟ ସନ୍ଧ୍ୟା ପ୍ରାୟ ୭ଟା ସୁଦ୍ଧା ଶେଷ ହେବ ବୋଲି ସୂଚନା ମିଳିଛି।
ଉଲ୍ଲେଖଯୋଗ୍ୟ, ଗତ ଜାନୁଆରୀ ମାସରେ ହୁଣ୍ଡି ଖୋଲାଯାଇଥିବା ବେଳେ ୧ କୋଟି ୫ ଲକ୍ଷ ୫୨ ହଜାର ୮୪୫ ଟଙ୍କା ନଗଦ, ୩୦ ଗ୍ରାମ ସୁନା, ୨ କିଲୋ ୧୫୦ ଗ୍ରାମ ରୂପା, ୨୩ଟି ବିଦେଶୀ ନୋଟ ଏବଂ ୪ଟି ଅଚଳ ପୁରୁଣା ନୋଟ ମିଳିଥିଲା। ମା’ ମଝିଘରିଆଣୀଙ୍କ ପ୍ରତି ଅଗାଧ ଆସ୍ଥା ରଖି ଓଡ଼ିଶା, ଆନ୍ଧ୍ରପ୍ରଦେଶ ଓ ଛତିଶଗଡ଼ରୁ ପ୍ରତିଦିନ ହଜାର ହଜାର ଭକ୍ତ ମନ୍ଦିରକୁ ଆସି ନଗଦ ଅର୍ଥ, ସୁନା, ରୂପା ଓ ବିଭିନ୍ନ ଅଳଙ୍କାର ଦାନ କରିଥାନ୍ତି। ଚଳିତ ଥରର ଗଣତି ଶେଷ ହେବା ପରେ ମୋଟ ଦାନର ପରିମାଣ ସମ୍ପର୍କରେ ମନ୍ଦିର ପରିଚାଳନା କମିଟି ପକ୍ଷରୁ ସରକାରୀ ସୂଚନା ପ୍ରକାଶ କରାଯିବ।
