ଦିଲ୍ଲୀର ରାମଲୀଳା ମୈଦାନରେ INDIA ମେଣ୍ଟ ପକ୍ଷରୁ ଆୟୋଜିତ ‘ଭୋଟ୍ ବଚାଓ, ଦେଶ ବଚାଓ’ ମହାରାଲିରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ। ‘ମୋଦୀ ହଟାଅ, ଗଣତନ୍ତ୍ର ବଞ୍ଚାଅ’ ନାରା ଦେଇ ସେ କହିଛନ୍ତି, ଗଣତନ୍ତ୍ର ଓ ସମ୍ବିଧାନର ସୁରକ୍ଷା ପାଇଁ ବିରୋଧୀଙ୍କ ଲଢ଼େଇ ଜାରି ରହିବ।
ଖଡଗେ ନିଜ ଭାଷଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହ ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ଟାର୍ଗେଟ କରିଥିଲେ। ଭୋଟ୍ ଚୋରି ଓ ନିର୍ବାଚନୀ ପ୍ରକ୍ରିୟାରେ ଅନିୟମିତତା ଭଳି ପ୍ରସଙ୍ଗ ଉଠାଇ ଯୁବକ, ମହିଳା ଓ ଦଳିତଙ୍କ ଭୋଟ୍ ଅଧିକାରର ସୁରକ୍ଷା ପାଇଁ ବିରୋଧୀ ଏକଜୁଟ୍ ହୋଇଥିବା କହିଛନ୍ତି।
ମୁଖ୍ୟ ନିର୍ବାଚନ କମିଶନରଙ୍କୁ ନେଇ ଖଡଗେ କହିଛନ୍ତି, ଜ୍ଞାନେଶ କୁମାର ପଦରୁ ନ ହଟିବା ପର୍ଯ୍ୟନ୍ତ ବିରୋଧୀଙ୍କ ଲଢ଼େଇ ଜାରି ରହିବ। ସେହିପରି ସିବିଆଇ ଓ ଇଡି ଭଳି କେନ୍ଦ୍ରୀୟ ତଦନ୍ତକାରୀ ସଂସ୍ଥା ଜରିଆରେ ବିରୋଧୀ ନେତାଙ୍କୁ ଭୟଭୀତ କରାଯାଉଥିବା ସେ ଅଭିଯୋଗ କରିଛନ୍ତି। ତେବେ ଏଭଳି ଚାପରେ ବିରୋଧୀ ଡରିବେ ନାହିଁ ବୋଲି ସ୍ପଷ୍ଟ କରିଛନ୍ତି।
ଏହି ରାଲିରେ ମହାରାଷ୍ଟ୍ର, ବିହାର ଓ ଉତ୍ତରପ୍ରଦେଶର ନିର୍ବାଚନୀ ପ୍ରସଙ୍ଗ ଉଠାଇ ଖଡଗେ ସେଠାକାର ସରକାରଙ୍କୁ ମଧ୍ୟ ସମାଲୋଚନା କରିଥିଲେ। ଦିଲ୍ଲୀର ରାମଲୀଳା ମୈଦାନରେ ଆୟୋଜିତ ଏହି ସମାବେଶରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ, ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ, ମମତା ବାନାର୍ଜୀ ଓ ତେଜସ୍ୱୀ ଯାଦବଙ୍କ ସମେତ INDIA ମେଣ୍ଟର ବହୁ ନେତା ଓ କର୍ମୀ ଯୋଗ ଦେଇଥିଲେ।
