ବାଲ୍ୟ ବିବାହ ଓ କମ୍ ବୟସରେ ଗର୍ଭଧାରଣ ରୋକିବା ପାଇଁ ସୁନ୍ଦରଗଡ଼ ଜିଲ୍ଲା ପ୍ରଶାସନ ଅଭିଯାନକୁ ଆହୁରି ଜୋରଦାର କରିଛି। ଶନିବାର ବାଲିଶଙ୍କରା ବ୍ଲକରୁ ଦୁଇଜଣ ୧୬ ବର୍ଷୀୟ ଗର୍ଭବତୀ ନାବାଳିକାଙ୍କୁ ଉଦ୍ଧାର କରି ସୁରକ୍ଷିତ ଆଶ୍ରୟ କେନ୍ଦ୍ରକୁ ପଠାଯାଇଛି। ତଳସରା ଓ କିଞ୍ଜିରକେଲା ଥାନା ଅଞ୍ଚଳର ଏହି ଦୁଇ ନାବାଳିକା ଆଦିବାସୀ ପରମ୍ପରା ଅନୁସାରେ ଦୁଇ ଯୁବକଙ୍କ ସହ ରହୁଥିଲେ ଏବଂ ବର୍ତ୍ତମାନ ଉଭୟ ଗର୍ଭବତୀ ଅଛନ୍ତି।
ଗାଁର ଅଙ୍ଗନବାଡ଼ି କେନ୍ଦ୍ର ଓ ଆଶାକର୍ମୀଙ୍କଠାରୁ ସୂଚନା ମିଳିବା ପରେ ଜିଲ୍ଲା ସମାଜ କଲ୍ୟାଣ ବିଭାଗର ନିର୍ଦ୍ଦେଶରେ ସମନ୍ୱିତ ମା’ ଓ ଶିଶୁ ବିକାଶ ବିଭାଗର ଅଧିକାରୀମାନେ ସେମାନଙ୍କ ନିକଟରେ ପହଞ୍ଚିଥିଲେ। ଅଧିକାରୀମାନେ କମ୍ ବୟସରେ ଗର୍ଭଧାରଣ ମା’ ଓ ଶିଶୁଙ୍କ ସ୍ୱାସ୍ଥ୍ୟ ପାଇଁ ବିପଦଜନକ ବୋଲି ବୁଝାଇବା ସହ ଆଇନଗତ ବ୍ୟବସ୍ଥା ସମ୍ପର୍କରେ ସଚେତନ କରିଥିଲେ। ପରେ ଉଭୟ ନାବାଳିକାଙ୍କୁ ଉଦ୍ଧାର କରି ସୁନ୍ଦରଗଡ଼ ଆଶ୍ରୟ କେନ୍ଦ୍ରରେ ରଖାଯାଇଛି। ବାଲ୍ୟ ବିବାହ ଓ କମ୍ ବୟସରେ ଗର୍ଭଧାରଣ ବିରୋଧରେ ପ୍ରଶାସନର ଏହି ପଦକ୍ଷେପ ସହ ଗ୍ରାମାଞ୍ଚଳରେ ସଚେତନତା ବୃଦ୍ଧି ଉପରେ ମଧ୍ୟ ଗୁରୁତ୍ୱ ଦିଆଯାଉଛି।
