ସାବଧାନ ! କିଛି ଲୋକ ଆପଣଙ୍କୁ ପିଛା କରୁଛନ୍ତି

ନୂଆଦିଲ୍ଲୀ: ପୁଣି ଚର୍ଚ୍ଚାରେ ମହାରାଷ୍ଟ୍ର ଅମରାବତୀର ସ୍ବାଧୀନ ସାଂସଦ ନବନୀତ ରାଣା। ପୂର୍ବରୁ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଘର ସାମ୍ନାରେ ହନୁମାନ ଚାଳିଶା ପାଠ କରିବାକୁ ଘୋଷଣା କରି ବିବାଦକୁ ଆସିଥିଲେ ସାଂସଦ ନବନୀତ ରାଣା । ଔଷଧ ଦୋକାନୀ ଉମେଶ କୋଲହେଙ୍କ ହତ୍ୟା ମାମଲା ଏବଂ ହିନ୍ଦୁଙ୍କ ସ୍ୱାର୍ଥରେ ସ୍ୱର ଉତ୍ତୋଳନ କରିଥିବାରୁ ତାଙ୍କୁ ନିରନ୍ତର ହତ୍ୟା ଧମକ ମିଳୁଥିବା ସାମ୍ନାକୁ ଆସିଛି। ଏମଧ୍ୟରେ ନବନୀତଙ୍କୁ ଏକ ଅଜ୍ଞାତ ଚିଠି ମିଳିଛି। ଏହି ଚିଠିରେ ଜଣେ ଅଜ୍ଞାତ ବ୍ୟକ୍ତି ତାଙ୍କୁ ଚେତାବନୀ ଦେଇଛନ୍ତି ଯେ କିଛି ଲୋକ ତାଙ୍କୁ ଅନୁସରଣ କରୁଛନ୍ତି, ତେଣୁ ସେ ସତର୍କ ରହିବା ଉଚିତ୍।
ଚିଠିରେ ଲେଖାଯାଇଛି ଯେ, ମ୍ୟାଡାମ ମୁଁ ମୋର ନାମ କହିପାରିବି ନାହିଁ। ମୁଁ ଆପଣଙ୍କ ସହରର ଜଣେ ସାଧାରଣ ନାଗରିକ। କିନ୍ତୁ ମୁଁ ଆପଣଙ୍କୁ ସତର୍କ କରିବାକୁ ଚାହୁଁଛି ଯେ ଆପଣ ଟିକେ ସତର୍କ ରହିବା ଉଚିତ୍। କାରଣ କିଛି ଲୋକ ଆପଣଙ୍କୁ ଅନୁସରଣ କରୁଛନ୍ତି। ଆପଣ ମୋତେ ବହୁତ ସାହାଯ୍ୟ କରିଛନ୍ତି। ମୁଁ ଜଣେ ସରକାରୀ କର୍ମଚାରୀ। ଏହି ଚିଠିରେ ଆହୁରି ଲେଖାଯାଇଛି, ମୁଁ ଆପଣଙ୍କୁ କହିବାକୁ ଚାହେଁ ଯେ ରାଜସ୍ଥାନ ସୀମାରୁ ଅମରାବତୀକୁ କିଛି ସନ୍ଦିଗ୍ଧ ଲୋକ ଆସିଛନ୍ତି। ମୁଁ ଏହି ସୂଚନା ପାଇଛି ଯେ ସେମାନେ ମଧ୍ୟ ଆପଣଙ୍କ ଘରକୁ ଯାଇ ଆସିଛନ୍ତି।